Парклар һәм скверлар дирекциясе үзенең бишьеллыгын билгеләп үтә

11 нче июньдә Казанның Парклар һәм скверлар дирекциясе үзенең бишьеллыгын билгеләп үтәчәк. Беренче юбилей уңаеннан дирекция командасы шәһәр халкы һәм кунаклары өчен бәйрәм программасы әзерләде. Аның хедлайнеры Казахстаннан Dose дип аталган музыкант булачак.

Бәйрәм Горький исемендәге паркта пикник форматында узачак. Фестиваль кунаклары Тамара NOVA һәм Хәким башкаруындагы җырлар, Казан диджейларыннан лайв-сетлар астында күңел ачачак. Паркта ял зонасы, фуд-корт, фрисби, бадминтон һәм пледлар прокаты белән мәйданчык, ретро-кемпингтан фотозона оештырылачак. Горький исемендәге паркның яшел кырын «Кырларда чәчәкләр» арт-объекты белән бизәячәкләр. Бәйрәмгә өстәмә итеп тәм-томнар белән тутырылган уенчыклар (пиньята) булачак. Пикник кунаклары бүләкләр алачак, дип хәбәр иттеләр Парклар һәм скверлар дирекциясендә.

Бәйрәм 17:00 дән 22:00 гә кадәр узачак.

Парклар һәм скверлар дирекциясе 2017 елда җәмәгать киңлекләрен саклау һәм максатчан файдалану максатыннан оештырылган иде. Ул территорияләрне карап тоту һәм төзекләндерү, аларның мәдәни программалар һәм вакыйгалар белән тулыландыру белән шөгыльләнә, шулай ук җәмәгать урыннарында эшкуарлык эшчәнлегенә ярдәм итә.

Чыганак: kzn.ru