Логотип Идель
Реклама
Социальная реклама
Яңалыклар

Рәмзия Галимова «Идел» журналының яңа саны турында: Бу – команда эше - «Татар-информ»

ИТ-паркның түбәсендә «Идел» журналының яңа саны презентациясенә багышланган кичә булды. «Идел» журналы баш мөхәррире Рәмзия Галимова журналның яңа санын чыгаруны команданың эше дип атады.

«Бу көнне зур дулкынлану белән көттем. Барлык килгән кешегә рәхмәт. Кичәне яңартылган «Идел» журналы презентациясе дип атадык. Үзем чыгарган журналның беренче санын кулга алгач, еладым. Хәзер дә күзләргә яшь килә. Ул шулкадәр зур хезмәт. Бөтен күңелне биреп эшләдек. Искиткеч хисләр. Яңа санны сатып алып бетерделәр, презентация үткәрергә журнал калмады. Шуңа күрә кичәне алданрак үткәрергә тиеш идек. Хәзер журналның тиражын арттырып чыгардык. Күрәм: бөтен кешенең кулында яңа «Идел» журналы», – диде ул.

Аның әйтүенчә, «Идел» журналы яшь иҗатчылар өчен мәйданчык булган һәм ул хәзер дә шулай булып кала. «Яшь шагыйрьләр, музыкантлар, сәнгатьчеләр – барысы турында журнал аша сөйлибез. Журналны карап, укып, актарып чыксагыз һәм теләк-тәкъдимнәрегез булса, бик шат булачакмын. Сезнең ярдәмнән башка кызыклы итеп чыгара алмас идек. Бергә бердәм командадан башка бу эшне башкарып чыгып булмас иде», – диде баш мөхәррир.

«Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев журнал хезмәткәрләрен котлады. «Күп кунак килгән. Милли җанлы, хисле кичә. Шулкадәр халык җыелган икән, димәк, халык арасында ышаныч тудыра. Киләчәктә дә шулай эшләргә язсын. Журнал кәгазь вариантта гына түгел, Телеграм һәм ВКонтакте социаль челтәрләрендә, YouTube хостингында да бар. Укыгыз, аралашыгыз», – диде ул.

«Идел» - яшьләр өчен журнал. Шуңа күрә без бергәләп матур итеп журнал өстендә эшләячәкбез. Күмәк проектларыбыз күп булсын», – диде Татарстан Яшьләр эшләре министры Ринат Садыйков.

Реклама

«Татмедиа» АҖ генераль директоры Шамил Садыйков кичәгә 880 кеше килергә теләк белдергәнен әйтте.

«Шулкадәр күп кеше килер дип уйламаган идек. Гариза кабул итүне туктатырга туры килде. Кешегә татар теле кызык түгел, татарча укучылар, татарча эшли торган яшьләр юк, дигән шик-шөбһәбез бар иде. Күрәсез: биредә иң яхшы, матур коллектив. Иң мөһиме – аудитория дә зур. Килә алмаган кешеләр дә бик күп. Иң сөенечлесе шул: телебез бетми, укучыларыбыз, матур журналларыбыз күп. Журнал да кирәк, интернет белән генә дөнья бармый. Төрле форматта матур итеп эшләргә язсын», – диде ул.

«Күпмедер дәрәҗәдә акыл ягыннан үзгәреш булды. Журналның максатын татарларны саклап калу, зәвыкландыру дип билгелибез икән, чаралар форматы, ягъни кешеләрне туплау, истә кала торган чаралар үткәрү һәм шуның тирәсендә бию иҗтимагый яктан отышлы», – диде «Идел» журналының веб-редакторы Зөләйха Камалова.

Милана Багрецова «Идел» журналын тәкъдим итү кичәсе турында очраклы белеп алган. «Идел» журналы минем өчен яңалык сүзе белән тәңгәл. Журналның яңа саны, яңа кешеләр белән танышырга килдем», – диде ул «Татар-информ» хәбәрчесенә.

  • Кичә дәвамында шагыйрәләр Гүзәлә, Миләүшә Гафурова һәм Лилия Низамова шигъри перфоманс тәкъдим итте. Gauga төркеме, Илгиз Шәйхразиев, Рәдиф Кашапов, Лилия Хәйруллина, Артур Шәйдуллин чыгыш ясады. Диджей – Malsi Music, алып баручы – Рәдиф Әхмәдиев.

ЧЫГАНАК: ТАТАР-ИНФОРМ.

Фоторепортаж

АВТОР: Зилә Мөбәрәкшина. 

Следите за самым важным и интересным в Telegram-каналеТатмедиа

Нет комментариев