«Созвездие – Йолдызлык» фестиваленең шәһәр этабында катнашу өчен 400 дән артык гариза тапшырылган

Ел саен үткәрелә торган «Созвездие – Йолдызлык» эстрада сәнгате яшьләр фестиваленең шәһәр этабына 400 дән артык гариза килгән – бу 3,5 мең кеше. Фестивальнең сайлап алу этапларында соңгы елларда яшь артистлар саны рекордлы – 7 меңгә якын. Фестивальнең гала-концерты 27 нче мартта «Пирамида» мәдәни-күңел ачу комплексында узачак. Бу хакта эшлекле дүшәмбедә Казанның балалар һәм яшьләр эшләре комитеты рәисе Алия Заһидуллина хәбәр итте.

«Яшьләр фестивале күп санда танылган мәдәният һәм җәмәгать эшлеклеләренә генә түгел, җитәкчеләргә дә тормышка юл ачты. Казан балаларының күз алдыбызда үсеп, йолдызлар булып җитүләрен күрдек. Моны узучылар гына, кеше сәхнәгә чыкканчы нинди зур эш башкарылганын аңлыйлар. Бу һәрвакыт иң яхшылар һәм иң көчлеләр җиңә торган ярыш», – дип шәрехләде Казан Мэры Илсур Метшин. 

«Йолдызлык» фестивале беренче тапкыр 1992 елда үткәрелә. Мондый чара ярдәмендә Казанның 5 яшьтән алып 21 яшькә кадәрге сәләтле балалары иҗади планда үсү мөмкинлегенә ия. «Фестиваль күпләргә эстрада сәнгате өлкәсенә юл ача, педагогик эшчәнлекнең абруен һәм статусын күтәрә. 2023 ел республикада Милли мәдәниятләр һәм гореф-гадәтләр елы дип игълан ителде, моңа фестивальнең иҗади номерларындагы тематикаларның берсе багышланган», - дип аңлатты Алия Заһидуллина. 

Шәһәр башлыгы балаларны мондый атмосферада укыту һәм тәрбияләү бик файдалы, дип ассызыклады. «Дөньяның алдынгы югары уку йортларына резюме язылганда, яхшы уку белән беррәттән иҗади проектларда һәм спорт проектларында катнашу да өстенлек бирә. Казанда балаларыбызның академик белем алу белән беррәттән үзләренең иҗади һәм спорт потенциалларын ачу мөмкинлеге булсын өчен без барысын да эшләячәкбез», - диде И.Метшин. 

Шәһәр этабы жюри составына ТАССРның атказанган артисты, ТАССРның халык артисты, Муса Җәлил исемендәге Республика премиясе лауреаты, җырчы Римма Ибраһимова, Татарстан Республикасының халык артисты һәм балетмейстер Таһир Латифуллин, Татарстан Республикасының атказанган артисты, Яшь тамашачылар театры актрисасы Елена Калаганова керде. Фестивальнең шәһәр этабына 4 номинация буенча (вокал-соло, вокаль ансамбльләр, хореография, конферанс) 3500 катнашучы 400 нән артык заявка тапшырган. 

«Шунысын да билгеләп үтәргә кирәк, фестивальдә бер генә иҗат буыны үсмәде – кече төркемнәрдән башлаган балалар хәзер инде өлкәннәр төркемендә чыгыш ясый», - дип билгеләп үтте А.Заһидуллина.

Чыганак: kzn.ru