Тинчурин театрында драматург Туфан Миңнуллинны искә алалар

15 июньдә Тинчурин театрында драматург Туфан Миңнуллинның «Төш» спектакленең 10 еллыгы билгеләп үтелә, дип хәбәр итә театрның матбугат үзәге.

«Төш» спектакле – Туфан Миңнуллинның исән чагында сәхнә күргән соңгы әсәре.
«Төш» спектакленең 10 еллыгы хөрмәтенә театр музеенда Туфан Миңнуллинга багышланган күргәзмә эшләячәк. Фойеда Тинчурин театры артистлары Туфан Миңнуллин сүзләренә язылган җырларны башкарачак, Ильяс Камал җитәкчелегендәге Тинчурин театры камера оркестры уйнап торачак.

Туфан Миңнуллинны искә алу чарасында әдипнең якташлары – Кама Тамагы районы хакимияте вәкилләре дә катнашачак.

Тинчурин театрында Туфан Миңнуллинның 1968 елдан башлап 20гә якын әсәре сәхнәгә куела. «Ак тәүбә, кара тәүбә» пьесасы хәтта өч тапкыр куела һәм хәзер дә зур уңыш белән бара. Бүген театр репертуарында авторның «Алай түгел, болай ук», «Төш», «Ак тәүбә, кара тәүбә. Безнең көннәр» әсәрләре бар.

Чыганак: Татар-информ