Яз якынлаша: көчле салкыннарны көтәргә кирәкми

Соңгы көннәрдә Казанда февраль өчен хас булмаган җылы һава торышы булды. Шул ук вакытта шәһәрдә көчле салкыннар инде көтелми, дип сөйләде Казан федераль университетының метеорология, климатология һәм атмосфера экологиясе кафедрасы доценты Тимур Әүхәдиев.

Соңгы көннәрдә Казанда температура климатик нормалардан 11 градуска артып китте. Хәзерге һава торышы күбрәк март азагы – апрель башы өчен хас, дип билгеләп үтте Т.Әүхәдиев. «Февраль урталарында көннең озынаюын һәм кояш җылысы күләменең артуын исәпкә алып, көчле салкыннар инде көтәргә кирәкми», – дип хәбәр итте галим.

Хәзерге вакытта төбәк һавасы циклон перифериясе белән билгеләнә, бу исә көньяктан җылы һава ташкынын тәэмин итә, әмма иртәгә һава торышы югары атмосфера басымы белән билгеләнәчәк, дип билгеләп үтте Т.Әүхәдиев. Төнге температура бераз түбәнәячәк (5-10 градус суыкка кадәр). Юлларда бозлавык сакланачак.

«Перспективалар турында сөйләгәндә, төньяк ярымшар атмосферасында көнбатыш күчешнең өстенлекле саклануын билгеләп үтәргә кирәк. Атлантика безгә циклон артыннан циклон җибәрүне дәвам итә, бу безнең территориядә чагыштырмача җылы чорга китерергә мөмкин», – диде Т.Әүхәдиев.

25 нче февральдә Казанда синоптиклар аязучан болытлы һава, явым-төшемсез, җил көньяк-көнбатыштан булачак, дип җиткерәләр. Төнлә көнбатыштан талгын җил, көндез көньяктан талгын җил исәчәк. Төнлә томан көтелә. Һава температурасы төнлә 6-8 градус салкын, көндез 1-3 градуска кадәр салкын булачак. Юлларда көчле бозлавык.

Гомумән Татарстан буенча шулай ук аязучан болытлы һава торышы көтелә. Төнлә урыны белән бераз кар фаразлана, көндез явым-төшемсез булачак. Төнлә һәм иртән аерым районнарда томан көтелә. Төнлә һаваның минималь температурасы – 3 тән 8 градуска кадәр суык, аязган вакытта -13 градуска кадәр җитәчәк. Көндез максималь һава температурасы 0 дән 5 градуска кадәр салкын булачак. Юлларда бозлавык хасил булырга мөмкин.

Бүгенге көнгә Татарстан башкаласында 56 мм явым-төшем яуган, февраль ае нормасы 31 мм тәшкил итә.

Чыганак: kzn.ru