Yummy Music лейблының җәйге концертлар сериясе дәвам итә

Elina –  татар хатын-кызының замана шартларындагы тормышы турындагы проект

Элина Ситдикова — профессиональ опера җырчысы, педагог һәм сонграйтер, үз җырларында үз-үзеңә мәхәббәт, тирәдәге кешеләр белән мөнәсәбәтләр кору кебек мөһим темаларны ача. Ә проектның саунд-продюсеры Дмитрий Крапивин —  URTIC төркеменең оештыручысы һәм катнашучысы – татарча текстны һәм көйне эксперименталь R&B жанрына караган, стильле электрон яңгырашка сала. 

Al Su — үзен арт-поп жанрында эзләүче инди-артист 

Алсу Мансурова Gauga һәм Juna төркемнәренең гитаристы Марат Шәяхмәтов белән бергә иҗат итә. 

«Без ниндидер аерым юнәлештә эшләмибез, ә экспериментлар яратабыз. Марат мин тудырган гармонияләрне төрле төсләргә мана, аранжировканы кечкенә элементлардан җыя. Нәтиҗәдә, үзенчәлекле, ихласлык һәм хисләр гаммасы белән сугарылган тукыма килеп чыга. Трекларны тыңлаган саен яңа якларын ачачаксыз», – ди Алсу үзе.

Айрат Хәйруллин — татар Эд Шираны

Айрат Хәйруллин — бу егет чыгышы белән Сарман районыннан. Инди-поп жанрына караган, гади хисләр турындагы назлы җырлар яза һәм башкара. Күп кенә инди-артистлар кебек, Айрат аранжировкаларын да, инструмент белән тавышын да үзе яздыра.

K3DERT (Көчдәрт) — Казан DIY-триосы

Татар телендә иҗат итүче һәм тормыштан ләззәт алып яшәүче өч солисттан торган яшь DIY-төркем.

АлияНур —  блогер, автор-башкаручы, үз җырларын ике телдә, хип-хоп һәм поп жанрында иҗат итеп, башкара. 

Медицина хезмәткәре эшен ташлап, ул төрле масштаблы сәхнәләрне яуларга алына. Җырлар аша дус булу, көч бирү — артистка тормышындагы төп максатларының берсе.