Дамир Фәттахов: «ЯШЬЛӘРНЕ ЭЧКЕ ТУРИЗМ МӘСЬӘЛӘСЕ БОРЧЫЙ»

"Яшьләр вакыты" сүзен ишеткәч, сезнең күзалдыгызга нәрсә килеп баса? Бу сорауга егерме беренче гасыр яшьләре "Автобус туры", - дияр иде. Ник дигәндә, әлеге тур кысаларында Татарстанның шәһәр һәм район яшьләре үзләренең проектларын булдырдылар, якладылар, ә иң мөһиме киләчәктә чынга да ашырачаклар. Бүген Казанның МЕГА сәүдә үзәгендә әлеге тур буенча питчинг-сессиядә булып кайттык.

фото: ТР Яшьләр эшләре министрлыгы сайты

27 көн эчендә тур командасы Татарстан республикасының 45 муниципаль районында булырга өлгергән, шулай итеп 7740 километр юл үткән һәм яшьләр әзерләгән проектларның 600-дән артык презентациясен караган. Менә инде әлеге проектның рәсми рәвештә тәмамланыр вакыты да җиткән. 

Бүген ТР Яшьләр эшләре буенча министры Дамир Фәттаховка һәм Казан Башкарма комитетының балалар һәм яшьләр эшләре комитеты рәисе Айрат Фәизовка актив яшьләр 6 проект тәкъдим иттеләр. Проектлар шактый кызыклы, араларында күңел ачу, фән, экскурсия, лекторий, әтисез үскән балалар өчен лагерь һәм туризм кебек проектлар бар иде. Туризм дигәннән, Дамир Фәттахов яшьләрнең эчке туризм мәсьәләсе белән кызыксынуларын әйтеп үтте: "Туризм темасына быел күбрәк игътибар бирүләре сөендерә", - диде министр. 

Ул билгеләп үткәнчә, узган ел шундый ук турда эшкә урнашу һәм башка социаль мәсьәләләр турында күбрәк кызыксынган яшьләр.

Бүген, экспертлар фикеренчә, иң яхшы проект булып танылганы – Камила Латыйпованың - "Әтисез үсүче малайлар һәм яшүсмерләр өчен лагерь" проекты булды.

Бүгенге чара аның белән генә бетмәде, “Миллине актуаль ясар вакыт җитте” (“Пришло сделать национальное актуальным”) темасына яшьләр белән сөйләшү узды.