Лилиягә кемнәр шалтырата?

Лилия исемле робот кайбер сорауларга җавап белә икән. Ул – ясалма интеллект.

Әлеге телефон роботын Татарстанда эшләтеп җибәрделәр. Ул коронавирус инфекциясенә, электрон пропускларга кагылышлы сорауларга җавап бирә ала. Әгәр сорау аның өчен бик катлаулы тоелса, ул сезне чын кешеләр эшли торган контакт-үзәге белән тоташтырачак.

Бу хакта үзенең инстаграм сәхифәсендә Татарстанның дәүләт идарәсен цифрлы нигездә үстерү, мәгълүмат технологияләре һәм элемтә министры Айрат Хәйруллин язып чыкты. Лилиянең номерлары: +78432070103 яки 8-800-250-90-33.

Аның өстенлеге, Айрат Хәйруллин билгеләвенчә, армавында, 24 сәгать буе эшләвендә һәм һәрвакыт әйбәт мөгамәләдә булуында.

Татарстанның дәүләт идарәсен цифрлы нигездә үстерү, мәгълүмат технологияләре һәм элемтә министрлыгы командасы уйлап чыгарган әлеге робот халык белән эшли торган контакт-үзәкнең эшен җиңеләйткән.

Ләкин, мисал өчен, бүгенге коронавирус статистикасын Лилиядән сорап булмый, аны сез безнең сайттан укый аласыз.