ЖУРНАЛИСТ БУЛЫРГА ХЫЯЛЛАНУЧЫЛАР ӨЧЕН: БЮДЖЕТ УРЫННАР БАР!

КФУның Журналистика һәм медиакоммуникацияләр югары мәктәбендә быел бюджет урыннар булмавы турында язган идек. Өмет сүнмәгән икән әле - киләсе уку елында татар журналистикасы белгечлегенә җиде бюджет урыны биреләчәк, дип яза "Татар-информ".

Хәбәрдә болай диелә:

Бу урыннарга кабул ителгән абитуриентлар татар төркеме булып тупланачак.

Бюджет урыннарына кабул ителү, БДИ балларыннан тыш, эчке имтихан нәтиҗәләре буенча да алып барылачак. Журналист булырга хыялланып, иҗади бәйгеләрдә, фестивальләрдә катнашкан, портфолио туплаган абитуриентларның рейтингын эчке имтихан баллары ярдәмендә үстереп булачак, диде Гарифуллин. «Бюджет урыннарына без нәкъ менә шундый балаларны тәкъдим итәчәкбез», — дип аңлаткан Югары мәктәп профессоры Васил Гарифуллин.

«Әгәр редакцияләр мәктәп укучылары белән эшләсә, бәйгеләр оештырса, шул бәйгеләрдә җиңгән балаларны без бюджет урыннарына кабул итәр идек», - дигән профессор.