КАЛМАДЫ. ҮЛДЕ УЛ...ҮЛДЕ УЛ ИХЛАСЛЫК!

***

Калмады. Үлде ул... Үлде ул ихласлык!

Соң инде. Юк инде – карында... буылды...

Күрешер өченгә яралган учлар да

Һавада эленеп калды да... суынды.

Ваемсыз дөньядан себереп түгелде,

Кирәксез тибелде җаннарның җылысы.

Турады бәгырьне кисәкләп-кисәкләп

Тәкәббер йөзләрнең күгәргән кылычы.

Чәченнән сыйпады. Жәлләде, имештер...

Иреннең читендә каһкаһә биеде.

Олтаннар әлсерәп баш орды шайтанга:

«Мәйданда тапталды хыялның биеге!»

...Сап-салкын дөньядан кемнәрдер эзләр күк

Ярату ягылган кап-кайнар карларны.

Юк инде... Табылмас. Җуелган мәңгегә.

Бу җирдә ихласлык... үлде ул. Калмады.

Шулай ук укыгыз: ӨЧЕНЧЕ ШИГЫРЬ. Гөлүсә Батталова