«СУГЫШЛЫДА СУГЫШ БЕТКӘН КӨННЕ...»

Сугышлыда сугыш беткән көнне
Авыл мәйданы и гүләде!
Ул көн өчен авыл йөз иллеләп
Газинуры белән түләде...

...Бер ел элек Гафиятулла картка
Хәбәр килде: «Улың... Газинур...»
«Булыр, булыр, – диде, – монда да бит
Герой иде, башсыз иде ул!»

Халык белми – горурланасымы,
Белми әле – әллә жәлләсе...
Авыл карты әйтә: «Булыр, булыр!» –
Шунда сыеп беткән һәммәсе.

Ялгыз калгач, ул йөрәген тотар,
Кеше барда шулай дияр дә...
...Йөз иллеләп кара кайгы кайтты
Авылдагы якты өйләргә.

Сабантуйдан әнә халык кайта,
Киләчәккә дәшеп җыр белән...
Алар инде бер тән, бер җан булып
Әверелгән туган җир белән!

Хатын-кызлар кайта... Артларыннан
Җан-фәрманга әнә чабалар –
Көрәш мәйданында Газинурны
Алыштырыр бала-чагалар!..

ГАЗИНУР БАТЫР

Мөдәррис ӘГЪЛӘМ