ВАТАНЫМА

Шагыйрә Гөлүсә Батталова үзенең матур шигырьләре белән "Идел" журналы укучыларын һәрдаим сөендереп тора. Журналның май саны битләрендә дә аның шигырьләре урын алды. 

ВАТАНЫМА

("СӨЯЛМӘСКӘ" - Казан метросы)
⠀
Сөяләсем килә гаҗиз чакта...
Таянасым килә үзеңә!..
Хакың юк! дип ысылдыйлар җилләр,
Давыл булып суга теземә.
⠀
Ышанасым килә кодрәтеңә -
Көчен җуйган мәлдә йөрәгем.
Бер тамырдан шыткан мең бәгырьдә
Кардәш җанны тапмый йөдәдем.
⠀
Җилдерәсем килә юргаларда
Нугай җилен юри үчекләп!
Дәһшәтеңнән чыгып качсын иде
Кала нигезеннән көчекләр.
⠀
Табыласым килә хыялымның
Синдә чынга ашкан төшендә.
Тәндә каным ничә гасырлык соң,
Әле һаман шом бар эчемдә.
⠀
Сөялмәскә! Үрә басып миндә
Карусызлык шыта шым гына.
Манарадан аска карап торам -
Чынбарлыгым каба тыныма.
⠀
Баш июдән тыям үз-үземне,
Язма димен, берүк акылдан.
Тезләнергә хакым булмаса да,
Таянырга сиңа хакым бар!
⠀
Хакым бар!
⠀
09.10.2019

Шулай ук укыгыз:

Калатаулы Гөлүсә

Исән калсак...

БҮГЕНГЕ АЛТАЙ. БОРЫНГЫ ВАТАН

Кем татарның каймагы? (Әтнә театрының Финляндиядә күргәннәре)