Башкортстанда котычкыч давыл чыккан

Башкортстанның кайбер районнарыннан давыл узып киткән. Җилнең максималь тизлеге секундына 22 метрга кадәр җиткән. Берничә сәгать эчендә 63 агач, 10 реклама щитлары ауган, 9 автомобиль зыян күргән, 3 электр баганасы һәм бер җәмәгать транспорты тукталышы җимерелгән. Шулай ук давыл 7 бинаның түбәсен алып очырган, 9 урында ут сүнгән.

Бу очраклар Уфа, Ишембай, Стәрлетамак, Салават, Күмертау шәһәрләрендә, Уфа, Благовар, Дәүләкән, Иглин, Куергазы, Кыйгы, Мәләвез, Стәрлетамак, Кырмыскалы, Бәләбәй районнарында теркәлгән.

Һәлак булучы һәм зыян күрүчеләр әлегә юк. Ә Уфаның “Сосны” торак комплексында күзәтү видеокамералары объективына бер карасаң кызык та, кызганыч та хәл эләккән. Көчле җил чүп савытларын хәрәкәткә китерә. Алар бер-бер артлы машиналар өстенә барып бәрелә.

Чыганак: "Башинформ"