Газинур Моратның юбилей кичәсе ничек узган?

Бу атна башында Тукай премиясе лауреаты Газинур Морат 60 яшьлек юбилеен гөрләтеп үткәрде. Бәйрәм Тукай клубында узды. Язучының туган көне чын мәгънәсендә бәйрәм булды. Кичә “Газинур Морат дусларын җыя” дип исемләнгән иде. Хезмәттәшләре дә юбилярны котларга бәйрәмчә, милли киемнәр киеп килгән. Менә, мәсәлән, Галимҗан Гыйльманов, Газинур дусты хөрмәтенә бию башкарды.

 Ә менә Гәрәй Рәхимн турында кичәдә Роберт Миңнуллин шигырь чыгарып өлгергән. Аны ул үз инстаграм битенә урнаштырган.

"Гәрәй Рәхимнең чын йөзе. Менә бу чынлап та Григорий Васильевич Родионов ичмасам! Дөресен әйтим, Татарстанның халык шагыйре Гәрәй Рәхимне керәшен киемендә беренче тапкыр күрүем! Ну килешә икән үзенә! Чын керәшен!
Бу фотоны күргәч, Гәрәйгә багышланган кыска гына бер шигырем искә төште.
***
Гәрәй Рәхим төшми һаман
Шәп шагыйрьләр чутыннан.
Язганнарын укып карыйм, -
Шәп шагыйрь бит,
чукынган!"

Кунаклар залны тутырып килгәннәр. Традиция буенча, бәйрәм "Туган тел" җыры белән төгәлләнгән. Кичәдән соң Газинур Морат бәйрәменнән бик канәгать булуын да әйткән.

tatar-inform фотолары