Кабачоктан 3 гади рецепт

Кабачок сезоны да җитте. Үстерүе берни түгел, ә менә үскәч нишләтергә аны? Гади генә 3 рецепт тәкъдим итәбез:

Грильда кызган кабачок

Шашлыкка бик шәп җиңел гарнир әзерлисегез килсә, кабачок бик урынлы булачак. Кабачокны юып, шашлык зурлыгында итеп кисәбез (әрчергә кирәкми). Берәр савытка үсемлек мае, тоз һәм борыч салып, болгатып бер сәгатькә мариноваться итәргә калдырабыз. Мангалдагы ут шашлыкныкы кебек булырга тиеш, тик кабачок күпкә тизрәк әзер булачак. Аны туктаусыз әйләндереп торырга кирәк. Рәшәткәдә пешерсәгез уңайлырак. Телне йотарлык тәмле булып чыга, суык килеш тә искиткеч. Шундый үк ысул белән кызыл борыч һәм шампиньон гөмбәсен дә грильдә кызырып ашап була.

Фото: povarenok.ru

Духовкада пешкән сылды кабачок

Кабачокны юабыз, буйга дүрт-биш кисәккә бүләбез. Кабачокны әйбәтләп корытып майланган табага тезәбез, тозлыйбыз һәм духовкага 10 минутка җибәрәбез. Кабачок сусыл булып суы акса, аны җые алырга кирәк. Сыр кырабыз, кырылган сырга борыч, яраткан үләннәрне өстибез дә кабачок өстенә сибәбез һәм каты утта 5 -10 минут тотабыз. Кайнар килеш ашыйбыз.

Фото: rutxt.ru

Кабачоктан коймак

Кабачокны юып әрчибез, вак кыргычтан кырабыз, суын бераз сыгып түгәбез. Йомырка, тоз, борыч өстибез. Берничә аш кашыгы үсемлек мае һәм сөт өстибез. Болгата-болгата он кушабыз. Каймактан бераз сыеграк камыр чыгарга тиеш. Гади коймак кыздырган кебек кыздырабыз.

Фото: rutxt.ru