Марат Сәфиуллин: “Советлар Союзы таркалгандагы масштаблы кризис бу”

Хәзерге вакытта нефть бәясе һәм коронавирус пандемиясе фонында Россия икътисадында барган вакыйгалар масштабы буенча СССР таркалган чор белән чагыштырырлык.

РТ Фәннәр академиясе каршындагы Перспективалы икътисади тикшеренүләр үзәге директоры, КФУның икътисади һәм стратегик үсеш сораулары буенча проректор Марат Сәфиуллин шундый фикердә.
Ул хакимиятнең эшмәкәрлеккә һәм халыкка ярдәм итү чараларының беренчел булуын әйтте. Болардан соң тышкы һәм эчке икътисади элемтәләрне ныгыту буенча тагын башка адымнар да башкарылырга тиеш.
“Бу Советлар Союзы таркалгандагы масштаблы кризис. Бу уен эш түгел”, - диде икътисадчы.
Сәфиуллин сүзләре буенча, илнең һәм республиканың гади халкына бу очракта үзенең чыгымнарын оптимальләштерергә һәм экономия режимын “кабызырга” кирәк. Икътисад Кытайның хәлләре яхшырганнан соң гына үсеп китәчәк, ди ул. Кытай инде коронавирус белән көрәшнең иң авыр чорын узды.
“Кытайның хәле әйбәтләнә башлады, димәк, барысы да әкеренләп үз тәртибенә кайтачак. Әгәр дә без башка илләргә караганда иртәрәк икътисади көч туплап өлгерсәк, безнең яңа базарларны алырга конъюктур мөмкинлекләребез барлыкка киләчәк һәм без яңа икътисади берләшмәләргә керә алачакбыз. Әлеге мөмкинлекне кулланасы килә”, - диде Марат Сәфиуллин.
 

Чыганак: tatar-inform.ru