РЕСПУБЛИКАКҮЛӘМ ИФТАРГА 3 ТОННА ИТ ӘЗЕРЛӘНӘ

IX республикакүләм ифтар «Казан Экспо» халыкара күргәзмә үзәгендә 11 май көнне оештырыла.

Авыз ачу мәҗлесенә  5 мең кеше килер, (2018 елда республикакүләм ифтарда 15 мең кеше катнашты) дип көтелә. Бу хакта кичә  Татарстан мөфтие Камил хәзрәт Сәмигуллин журналистлар өчен оештырылган ифтар вакытында хәбәр итте. 

Исегезгә төшереп узабыз, былтыр мәгълүм сәбәпләр аркасында  республикакүләм ифтар үзгә форматта оештырылган иде. Быел “КазанЭкспо” мәйданчыгына 5 мең кеше  килсә, тагы 5 меңенә “Казан –Арена”стадионыннан ланч-бокс  таратылачак.

Авыз ачучылар өчен пылау, җиләк-җимеш, яшелчә, баллы ризык әзерләнә. Дини мәҗлесне оештыручылар белдергәнчә, быел менюга бал-май да кертелгән.  Республикакүләм ифтарга 10 миллионлап акча тотылачак, һәр авыз ачырга килгән кешегә 500 сумлык ризык каралган, 3 тонна ит әзерләнә, ди мәҗлесне оештыручылар.

Ифтарга чакыру билетлары 4 майдан район мөхтәсибләренә таратылачак. “КазанЭкспо”га  Г.Тукай исемендәге Казан аэропортына баручы электричкада яки шәхси машиналарда килергә мөмкин булачак.