Унике мөмкинлектән - сигез алтын. Яхшымы бу, начармы?

Татарстан көрәшчеләре Димитровградта узган Идел буе шәһәрләре турнирында уңышлы чыгыш ясады. Биш көрәшчебез Россиянең спорт остасы исемен алырга мөмкин.

Хәбәр иткәнебезчә, олылар арасындагы ярыш мастерлык статусына ия, яшьләр исә спорт остасына кандидат исеме алырга мөмкин.

БУ ТУРЫНДА УКЫРГА: Димитровградка Татарстан ике команда алып бара

Безгә килеп ирешкән мәгълүматларга караганда, олылар арасында Татарстан көрәшчеләре алты мөмкинлектән - биш алтын һәм бер көмеш медаль алып кайта. Аерым алганда, турнирның җиңүчеләре булып Дмитрий Гайниев, Илшат Таһиров, Айрат Хәйруллин, Данис Закиров һәм Айрат Фәтхуллин танылган. Рөстәм Салахов исә көмеш медальгә ия булган. Олылар арасында тренер итеп Җәүдәт Хөсәенов билгеләнгән.

Яшьләр арасында уңышларыбыз тыйнаграк. Айнур Каюмов (Чаллы), Салават Гәрәев (Саба) Әлмир Мифтахов (Арча) чемпион булып танылса, Николай Захаров (Лаеш) - икенче урында.

Ярышлар турында тулырак мәгълүмат - алдагы язмаларда.