Ык буе авыллары Сабан туе батыры машина казанырмы?

Быел бәйрәм Актанышта уза. 16 июнь көнне, иртәнге тугыздан бәйрәм кунаклары Сабан туе мәйданына җыелачак. Бәйрәм төрле төбәкләрдән килгән кунаклары ямьле итеп, ачык күңел белән каршы алачак. Кунаклар чарага су юлыннан (Ык елгасыннан) матур итеп килер дип көтелә.

Ык буе Сабан туена әзерлек кыштан ук бара. Бәйрәм программасына концерт, милли уеннар, милли спорт төрләре, ат чабышы һәм башка бик кызыклы чаралар кертелгән. Милли уеннарда Актаныш Ык елгасы тирәсендә урнашкан 13 район катнашачак, ә менә көрәштә барлык теләгән кешене дә катнаштырачаклар. Җиңүчеләр буш кул белән китмәячәк.

Әлбәттә, көрәш тәкәсез генә булмый, моннан кала, батыр чыкканнарга саллы гына сумма да каралган. Бүгенге көндә җитәкчеләр белән машина бүләк итү турында да сөйләшүләр алып барыла. Ничек кенә булмасын, үпкәләп китүчеләр булмаячак.

Киләсе елдан бүләкләр арасында татар атлары токымы колыны бүләк итү дә булыр дигән өмет бар.