ИЮНЬДӘ КАЗАНДА 5 КЕШЕ СУДА БАТЫП ВАФАТ БУЛГАН

Су буенда ял итү урыннарының әлегә ачылмаган булуына карамастан, Казан халкы бу тыюларга игътибар итми...

Узган ай эчендә генә дә башкалада 5 кеше суда батып вафат булган. Бу хакта Казан шәһәре башкарма комитетының гражданнарны саклау идарәсе башлыгы Фердинанд Тимерханов  хәбәр итә.

Барлыгы Россия буенча узган елны 4 мең кеше, Татарстанда 34 кеше батып үлә. Узган елны Казанда 3 кеше шулай вафат була.

Тимерханов сүзләренчә, батучылар арасында ир-атлар ике тапкырга күбрәк, чөнки алар еш кына берүзләре һәм исерек килеш коена.

- Без пляжлар ачылуга әзер, ләкин эпидемик вәзгыять әйбәтләнгәнче ябык булачакбыз, - диде Тимерханов.