ФОТОГРАФ - СИНЕҢ ЯКЫН ДУСТЫҢ

Син фотога төшәргә яратасыңмы? Ә төшерергә?

Бүген без сиңа фотога төшерүнең берничә кагыйдәсе турында сөйләрбез!

💡УТ

  Игътибар иткәнегез бардыр, караңгы фотолар бер дә кызыксыну уятмый. Димәк, фотога төшергәндә яктылык турында онытмаска кирәк: кояшны модель артында калдырырга тырышмагыз. 

БУШ УРЫН

   Предметлар арасында "һава" калырга тиеш, ягъни буш ара кадрның өчтән бер өлешне тәшкил итсә яхшырак. Ул очракта игътибар да конкрет предметка юнәләчәк.

ФОН

    Фонны бер тонда яки якты итәргә мөмкин. Вак детальләр (мәсәлән, агач өстәл, ефәк тукыма, мрамор, плед) төшергәндә "текстуралы фон" яхшырак.

РЕКВИЗИТ

  Фотоның үзенчәлеге - реквизитның күп булуында. Шуңа күрә фотосессиягә барырга әзерләнсәгез, букчагызны төрле предметлар белән тутырырга иренмәгез. Фотоның универсальлеге дә, уңышы да шуңа бәйле. Фотограф - тәҗрибәләр эшләргә ярата. Ләкин реквизитлар үзара туры килергә дә тиеш. (Мәсәлән, котлау хаты, китап, журнал, кәһвә, чәчәкләр, флаконнардан менә дигән фотосурәт ясарга мөмкин!) Минимализм яраткан кешеләр исә бер-ике реквизиттан да шәп кадр чыгара ала. Барысы да синең фантазияңнән тора.

РАКУРС

  Фотога төшергәндә иң яхшы ракурс булып - югарыдан төшерү санала. Предметларны җирлеккә тезгәннән соң, объективны идән яки өстәл белән параллель куярга кирәк. Кадрны күбрәк ясарга киңәш итәбез, күбрәк ракурстан төшергән саен әйбәтрәк.

АЯК-КУЛЛАР

   Кешене төшергән очракта аның аяк-кулларына игътибар итегез: кадрда аның очлыклары киселгән булса, фото матур килеп чыкмаячак. 

ИХЛАСЛЫК

   Фотограф ул фотога төшерүче генә түгел, режиссер, психолог, якын дус та. Модельне фотога төшерергә тотынганчы, сөйләштерегез, кәефен күтәрегез. Шуннан соң фотолар да ихлас,чын эмоция белән чыгачак!

 Безнең киңәшләрне истә тотып, әлегә Гөлия Имамова һәм Алсу Җамалиева төшергән фотоларны карап чыгыгыз. 

фото: pixabay.com