«ЯШЬЛӘР ВАКЫТЫ». БҮГЕНГЕ КӨН НӘТИҖӘЛӘРЕ

9 сентябрь көнне “Мега” сәүдә үзәгендә “Яшьләр вакыты” проектының ярыммарафоны булып узды. Көндезге 11дән алып кичке 9гача һәр сәгать саен төрле-төрле чаралар уздырды. Иң ахыргы чыгыш Яшьләр эшләре министры Дамир Фәттахов һәм Татарстан Яшьләр парламенты урынбасары Нина Шиминаныкы булды.

- Иң кызыгы, бүгенге очрашуларны безнең проектларда катнашкан яшьләр генә түгел, ә сәүдә үзәгенә килгән кунаклар да кызыксынып тыңлады. «Нәрсә соң ул «Яшьләр вакыты» проекты?»  - дип килеп сораучылар да күп булды. Мондый кызыксыну үзе үк күп нәрсә турында сөйли, димәк безнең эшебезнең киләчәге өметле. – дип үзенең бүгенге көн турындагы кичерешләре белән уртаклашты Нина Шимина.

- Миндә хәзер дежавю халәте. Иртән без монда идек, аннары Яр Чаллыга барып шәһәр мэры белән «Нур» яшьләр үзәген ачтык. Хәзер янәдән «Мега» сәүдә үзәгенең сәхнәсендә чыгыш ясыйм. Монда җыелган яшьләрнең, аеруча беренче рәтләрдә барлык чыгышларны да зур кызыксыну белән тыңлап утырган яшь лидерларның бер-берсенә ярдәм итүе бик дөрес гамәл. Әлеге проект ярдәмендә сез фикердәшләрегезне дә тапкансыздыр, дип уйлыйм, - дип Дамир Фәттахов катнашучыларга уңышлар теләде.

Автор фотолары