«ЖИЖИГ-ГАЛНАШ» - ЧЕЧЕН РИЗЫГЫ РЕЦЕПТЫ

Казаныбызда нинди генә кафе-рестораннар юк. Ни кызганыч, араларында  чечен халкының милли ризыкларын авыз итеп була торганнары юк. Шуны истә тотып,  Сәлим әфәнде үзе яратып әзерләгән  сый – «Жижиг-галнаш» рецепты тәкъдим итте.

1 кг сарык ите, 1 баш зур суган, тоз, борыч, он (кукуруз яки бодайныкы), 1 баш сарымсак, 1 йомырка, су кирәк.

    Майлы сарык итен, эре кисәкләргә турап, тозлы суда пешерәләр. Шулпага суган һәм бераз гына уылган кара борыч өстиләр. Сөягеннән аерыла башлагач ит әзер була. Аны алып, шулпаны утта калдыралар. 

    Галнашны болай ясыйлар: йомырка, су, тоз салып камыр басалар. Җәеп, башта – тасмаларга, ә тасмаларны ромбикларга кисәләр дә, һәркайсын янә җәяләр. Кабырчыкка охшатып почмакларын ябыштыралар, шулпада 15 минут чамасы пешерәләр. Аннары сөзеп алып тәлинкәгә салалар, өстенә итне куялар. Аерым савытта соус ясыйлар: сарымсакны изәләр, тоз белән уалар һәм кайнар шулпа өстиләр. Сыйны табынга чыгарырга мөмкин.