Зинира һәм Ризат Рамазановлар: «Өйдә иминлек булса, эш тә гөрләп бара»

Ризат һәм Зинира Рамазановлар – татар эстрадасында популяр һәм күркәм парларның берсе. Җыр алар өчен күңел халәте һәм яшәү рәвеше генә түгел, ә ике арадагы мәхәббәтне сакларга этәрә торган егәр дә әле.

- Тормышны нәрсәдән башка күз алдына китермисез?

Ризат: сәламәтлексез

Зинира: ут-сусыз

- Авыр чакта кемгә сыенасыз?

Ризат: элегрәк әнигә иде, хәзер хатынга

Зинира: Ризатка һәм ике як әнигә

- Мәхәббәт ул...

Ризат: мәхәббәт - мәхәббәт инде...

Зинира: хөрмәт, ышаныч

- Бәхет ул...

Ризат: гаилә

Зинира: якыннарымның исән-имин булуы

- Бер-берегездә үз иткән сыйфат?

Ризат: Зинираның тәвәккәллеге сокландыра

Зинира: Ризат янәшәсендә үземне кытай дивары артындагы кебек хис итәм, киләчәктә ач калмавына ышанам.

- Сезнеңчә, гаиләнең нигезе нәрсә?

Ризат: – Гаилә – ул ир белән хатын төзегән дәүләт. Аны саклап калуда икесенең дә, көч куеп, җаваплылык тоеп яшәве шарт. Өйне карамый торсаң, нигезе чери, түбәсе тишелә... Гаиләдә дә нәкъ шулай. Ир-егетләр шуны белсен: өйдә иминлек булса, эш тә гөрләп бара, башкалар тарафыннан хөрмәт тә арта.

– Өйләнгәч тә тормышын үзгәртергә теләмәгән егетләр бар. Ризат, синең очракта ничек булды?

Ризат: – Тормыш берсүзсез үзгәрә. Дусларның да күбрәк гаиләлеләре белән аралашырга тырышасың. Гаиләсез, дус-ишләр белән генә ерак китә алмыйсың. Алда бит әле һәммәбезне дә картлык көтә.

Фотолар: шәхси архив