Кадер эзләп килгән ярлар / Чынлап микән кадерле?!

Әллә сөеп горур булдык,
Башларны имәдек без.
Өрмәгән урындыкларга
Утыртмам, димәдек без.

Тормыш кебек кырыс идек,
Әйттеләр: «Таш бәгырьле...»
Кадер эзләп киткән ярлар
Булды микән кадерле?

Бәхетләре булды микән,
Уңдылар микән ирдән?
Яшәмиме икән алар
Яшьлекне каргап-тиргәп?

Сөйдек. Нәфрәтләндек.
Ләкин
Башларны имәдек шул.
Өрмәгән урындыкларга
Утыртмам, димәдек шул.

Бүген менә сулык-сулык
Үксетәбез бәгырьне.
Кадер эзләп килгән ярлар
Чынлап микән кадерле?!

Газинур Морат шигыре